ஆமாச்சு

ஜாவா தொழில் நுட்பத்தின் காரண கர்த்தாவான சன் மைக்ரோ சிஸ்டத்தை ஆரக்கிள் நிறுவனம் விலைக்கு வாங்கிவிட்டது. ஐபிஎம் சன்னை வாங்கப் போகிறது என்று செய்திகள் கசிந்து பின்னர் இல்லையென ஆன போது சற்றே பெருமூச்சு விட்டிருக்கையில் இப்படியொரு சேதி! நிற்க.

இத்தகைய கும்பெனி உட்கொள்கைகள் (அக்யூசிஷன்) ஏற்படும் போதும் மேற்கொள்ளப்பட வேண்டிய நெறிமுறைகள் பல இருக்கும் என்ற போதும் – மாடாய் உழைத்து எல்லாம் தந்த தொழிலாளர்களையும் சேர்த்து விலைபேசும் போது – தொழிலாளர்களின் கருத்துக்கள் ஏன் கேட்கப்படுவதில்லை? மாதச் சம்பளம் கிடைத்தால் போதும் கும்பனியை யார் நடத்தினால் என்ன என இவர்களும் ஏன் இருக்கிறார்கள்? தங்களது கருத்துக்கள் கேட்கப்பட வேண்டும் என இவர்கள் ஏன் நினைப்பதில்லை?

ஆரக்கிள் – மைக்ரோசாப்ட் நிறுவனத்தைப் போன்றே ஒரு தனியுரிம மென்பொருள் நிறுவனம். எப்படி டெபியன் (நான் பயன்படுத்தி வரும் உபுண்டுவை தவிர்த்த காரணம் கீழே விளங்கும்) உள்ளிட்ட கட்டற்ற இயங்குதளங்கள் விண்டோஸுக்கு ஆப்பு வைக்க தொடங்கியுள்ளனவோ அதே போல் ஆரக்கள்ளின் தரவுத் தள ஏக போக சாம்ராஜ்யத்தை அசைத்துக் காட்டியதில் மிகப்பெரிய பங்கு மை எஸ் க்யூ எல் எனும் கட்டற்ற தரவுத் தளத்திற்கு உண்டு.

ஆரக்கிள் – ஜாவா – விண்டோஸ் – வெப்லாஜிக் என்றிருந்த பயன்பாட்டு உருவாக்க தனியுரிம உலக நெறியை தகர்த்த கூட்டணியாகும் குனு/ லினக்ஸ் – அபாச்சி- மை எஸ் க்யூ எல் – பி எச் பி.

சன் மைக்ரோசிஸ்டமும் ஒரு காலகட்டத்தில் தனியுரிம மென்பொருள் ஏகாதிபதியாக கொடி கட்டித் திகழ்ந்து பின்னர் பல்வேறு காரணங்களுக்காக அதன் படைப்புகளை கட்டற்று செய்வதென முடிவு கொண்டது. இது கட்டற்ற மென்பொருள் சமூகத்தின் வரவேற்பையும் பெற்றது. தொடர்ந்து மை எஸ் க் யூ எல்லை விலைக்கும் வாங்கியது.

வரலாறு இப்படி இருக்க இன்றைய இச்சம்பவம் பல்வேறு வினாக்களை நம்முன்னே எழுப்பி நிற்கின்றது..

• கும்பனிகளால் போஷிக்கப்பட்டு பராமரிக்கப்படும் கட்டற்ற மென்பொருள் திட்டங்களுக்கு தொழிலாளர்களாகவும் – தன்னார்வலர்களாகவும் பங்களித்து வருவோர் இத்தகைய சூழலில் எத்தகைய முடிவினை மேற்கொள்வர்? மேற்கொள்ள வேண்டும்?
• ஒரு கும்பனி கட்டற்ற மென்பொருள் கோட்பாட்டை ஏற்றொழுகினாலும் – கும்பனி முறையில் உள்ள இக்கொடுக்கல் – வாங்கல் குற்றத்தின் காரணமான – தன்னை அது இழக்க நேரிடும் போது – அது அதன் பங்களிப்பாளர்களக்கு தரும் உத்தரவாதம் தான் என்ன? (தற்சமயம் நான் பங்களித்து வரும் உபுண்டு திட்டமும் ஒருவகையில் இத்தகையது என்கிற போது – எனக்கு நானே எழுப்பிக் கொள்ளும் கேள்வியுமாகும் இது – ஏற்கனவே சூசேவை நாவல் வாங்கியதால் ஏற்பட்ட சர்ச்சைகள் தொடர்ந்து கொண்டிருக்கின்றன…)
• இவற்றைக் கொண்டு பார்க்கிற போது முற்றிலும் சமூகம் சார்ந்த முறையால் உந்தப்பட்ட கட்டற்ற மென்பொருள் திட்டங்களே மேலானவையாக – கட்டற்ற தன்மைக்கு இறுதி வரை உறுதியளிப்பதாக தோன்றுகிறதே! ஆனால் கும்பனிகளைச் சாராது இவற்றை தொழில் ரீதியாக வெற்றி பெறச் செய்வது எப்படி?

இச்சம்பவத்திற்கே உரியதாக..

• கடந்த சில வருடங்களாக சன் மைக்ரோசிஸ்டம் உலகளாவி மேற்கொண்டு வரும் கட்டற்ற மென்பொருள் திட்டங்களின் நிலை என்னவாகும்? அவற்றின் பிரதி ஆரக்களின் நிலைப்பாடு எப்படி அமையும்?
• மை எஸ் க்யூ எல்லை சன் வாங்கியது.. சன்னை ஆரக்கிள் வாங்கியுள்ளது.. மை எஸ் க்யூ எல்லும் ஆரக்கிள்ளும் கோட்பாட்டு ரீதியாகவும் சரி – தொழில் ரீதியாகவும் எதிரெதிர் படைப்புகள். அப்படியிருக்க ஆரக்கள்ளிடம் விலை போய்விட்ட மை எஸ் க்யூ எல்லின் வருங்காலம் என்ன?

தொடரலாம்.. தூக்கம் தற்காலிகத் தடைபோடுகிறது..

தொடர்புடைய பதிவுகள்:

http://www.pluggd.in/technology/oracle-sun-acquisition-4027/
http://blogs.computerworld.com/oracle_sun_what_happens_to_mysql

தொழில் ரீதியான கட்டற்ற மென்பொருள் ஆதரவு நல்கிட ஒரு சிறிய முயற்சி.

வேணீ – நும் தாகம் தணிக்க – கட்டற்ற மென்பொருள் தீர்வுகள்

–

ஆமாச்சு

தாயைப் போல் பிள்ளையாச்சே. உபுண்டுவின் தாய் எப்படி இருக்கான்னு பாக்கலாமுன்னு டெபியன் முதல் தடவை நிறுவிப் பார்த்தேன்.

டெபியன் எட்ஜ் நிறுவினேங்க. நிறுவலில் அதிகச் சிக்கல் இல்லை. அடுத்தது தமிழ் வசதி வேணுமே என்ன செய்ய? நிறுவும் போது கேட்கப்படும் மொழிகளில் ஒன்றாகத் தமிழ் இல்லை.

அப்போ தமிழ் வசதி.. கிடைக்கும் கிடைக்கும்.. அட என்ன அவசரம்? டெபியன் நிறுவி… முனையத்தினை துவக்குங்க…

su கொடுத்து முதன்மைப் பயனர் அந்தஸ்தைப் பெறவும்..

# apt-get install ttf-tamil-fonts ஆணையிட்டால் தமிழ் எழுத்துக்கள் நிறுவப் படும்.

அடுத்து முனையத்தில்,

# dpkg-reconfigure locales ஆணையிடவும்…

configuring locales என வரும் சாளரத்தில் ta_IN UTF-8 தேர்வு செய்யவும்.

பின்னர் default locale for the system environment னைத் ta IN ஆகத் தேர்வுச் செய்யவும்.

தங்கள் கணினியினைத் மீளத் துவங்குங்கள்..

அப்பறம் என்ன தமிழ் இடைமுகப்பு சும்மா கும்முன்னு இருக்கும்… சரி தட்டழுத என்ன செய்யன்னு கேக்கறீங்களா?

மேல் தெரியும் பட்டியில் எலியத்தின் வலது பொத்தானைச் சொடுக்கினால், பலகத்தில் சேர்க்கவும் எனவரும் தேர்வினை ஏற்றால் Add to Panel என ஒரு சாளரம் எழும்பும்..

அதில் கீழிறங்கி விசைப் பலகை உணர்த்துனர் தேர்வுச் செய்யவும்.

பின்னர் மேல் பலகத்தில் USA எனத் தெரியும் விசைப் பலகை உணர்த்துனரில் வலதாகச் சொடுக்கி, பட்டிப் பட்டைக்கான தெரிவுகள் தேர்வு செய்தால் விசைப் பலகை விருப்பங்கள் என வரும் சாளரத்தில்… இட அமைவுகள் தத்தில் Add பொத்தானைச் சொடுக்கி India Tamil Unicode னைத் தேர்வுச் செய்யுங்கள்.

இயல்பா Alt-Alt விசைகளை அழுத்தினா தமிழுக்கும் ஆங்கிலத்துக்கும் மாறி மாறி பயனிக்கலாம்.. இவ்வமைப்பினை மாற்ற பக்க அமைப்பும் விருப்பங்கள் தத்தில் Group Shift/ Lock behavior னை நோட்டம் விடுங்கள்.

அப்பறம் என்ன ஜோரா இனி தட்டெழுதலாமே… எந்தச் செயலியிலும்…

பி.கு: ஸ்கிம் இன்னும் நிறுவிப் பார்க்கவில்லை… பார்த்து விட்டு தமிழ் விசை 99 குறித்துச் சொல்கிறேன்…